O‘zbekiston-Xitoy hukumatlararo qo‘mitasining transport sohasida hamkorlik bo‘yicha kichik qo‘mitasining sakkizinchi yig‘ilishi bo‘lib o‘tdi.

Videokonferens-aloqa shaklida o‘tkazilgan yig‘ilishda Transport vazirining birinchi o‘rinbosari Mamanbiy Omarov hamda Xitoy Xalq Respublikasi transport vaziri o‘rinbosari Vang Gang janoblari ishtirok etdi.

Yig‘ilishda tomonlar transport-kommunikatsiyalari sohasidagi hamkorlik aloqalarini yanada rivojlantirish, ikki mamlakat o‘rtasida yuk tashuvlari hajmini oshirish borasida qator masalalar yuzasidan samarali chora-tadbirlarni ishlab chiqish bilan bog‘liq masalalarni muhokama etishdi.

Xususan, tomonlar avtomobil transportida xalqaro yuk tashuvlari sohasida haydovchilarga viza berish, shuningdek, tijorat yuklarini tashish uchun Xitoy – Qirg‘iziston – O‘zbekiston ruxsatnomalaridan foydalanish bilan bog‘liq masalalarni kelishib oldi.

Shuningdek, yig‘ilishda temir yo‘l va aviatsiya sohasida hamkorlikni rivojlantirish, “Osiyo Tinch Okeani mintaqasi davlatlari – Xitoy – Qirg‘iziston – O‘zbekiston – Turkmaniston – Eron – Turkiya – Yevropa” multimodal transport koridori faoliyati, “Xitoy – Qirg‘iziston – O‘zbekiston” temir yo‘li qurilishi loyihasini amalga oshirish bilan bog‘liq masalalar ko‘rib chiqildi.