3-iyul kuni Transport vazirligida “Respublikaning turizm salohiyatini oshirish uchun transport infratuzilmasi va xizmatlarini takomillashtirish” mavzusida davra suhbati bo‘lib o‘tdi.

Transport vaziri Ilhom Maxkamov hamda Turizm qo‘mitasi raisining birinchi o‘rinbosari Jamshid Abdusalomov raisligida bo‘lib o‘tgan tadbirda transport infratuzilmasini yaxshilash orqali turistlarga xizmat ko‘rsatish sifatini oshirish masalalari muhokama etildi.

Uchrashuvda Transport vazirligi markaziy apparati, Turizm qo‘mitasi, Ichki ishlar vazirligi, Avtomobil yo‘llari qo‘mitasi, “O‘zaviatsiya” agentligi, “O‘zbekiston temir yo‘llari” AJ, “Uzbekistan Airports” AJ, “Uzbekistan airways” AJ, “Uzautotrans service” MChJ rahbarlari, xususiy aviakompaniyalar mutasaddilari, viloyat hokimlarining turizmni rivojlantirish masalalari bo‘yicha o‘rinbosarlari hamda turistik biznes vakillari ishtirok etishdi.

Ochiq muloqot shaklida o‘tkazilgan uchrashuvda mamlakatimizga xorijiy sayyohlarni jalb etish, sayohat safarlarini tashkil etish jarayonida turoperatorlar duch kelayotgan muammolar va ularning yechimi yuzasidan takliflar tinglandi.

Uchrashuvda ko‘tarilgan masalalar va ularning yechimi yuzasidan 3 ta yo‘nalishda alohida Ishchi guruhini shakllantirish bo‘yicha tizim mutasaddilariga ko‘rsatma berildi.

• Respublika yo‘llarining holatini tahlil qilish, turistik zonalarga olib boruvchi yo‘llarni to‘liq inventarizatsiyadan o‘tkazish hamda aniqlangan kamchiliklarni bartaraf etish bo‘yicha 2025 – 2027-yil dasturlarini shakllantirish;

• Har bir yo‘nalish bo‘yicha yo‘lovchilar oqimini tahlil qilish, mamlakatimizga xorijdan tashrif buyuruvchi sayyohlarning prognoz ko‘rsatkichlarini aniqlash;

• Transport va yo‘l bo‘yi infratuzilma obyektlaridagi mavjud muammolarni joyiga chiqqan holda aniqlash va yechimi bo‘yicha aniq takliflarni shakllantirish.

Shuningdek, har oyda bir marotaba turizm sohasi biznesi vakillari bilan shu shaklda muntazam ravishda uchrashuvlarni o‘tkazib borishga kelishib olindi.