Jamoat transportida qatnovlar xavfsizligi va qulayligi haydovchilarning kasbiy mahoratiga bog‘liq, shuning uchun ularni tayyorlashga mas’uliyat bilan yondashilmoqda.

Poytaxt jamoat transportida ko‘rsatilayotgan xizmatlar sifatini oshirish maqsadida Transport sohasi kadrlarini qayta tayyorlash va malakasini oshirish instituti tomonidan “Toshshahartransxizmat” AJ haydovchilari Yevropa ta’lim dasturlari asosida avtobusdan foydalanish va jamoat transportida yo‘lovchilarni samarali tashish bo‘yicha amaliy mashg‘ulotlar o‘tkazishmoqda.

Eslatib o‘tamiz, Institut tomonidan “Deutshe Bahn”, “DB Engineering&Consalting” kompaniyalari bilan hamkorlikda tashkil etilgan maxsus o‘quv kurslarida “Toshshahartransxizmat” AJning 21 nafar haydovchisi Yevropa mamlakatlari va milliy ta’lim dasturlari uyg‘unlashtirilgan o‘quv dasturiga muvofiq haydovchi- yo‘riqchilikka qayta tayyorgarlikdan o‘tkazildi.

2024-yil davomida “Toshshahartransxizmat” AJning 60 nafar haydovchisi Yevropa ta’lim dasturlari asosida o‘qitildi. Shuningdek, institutda boshqa turli dasturlar asosida yil boshidan buyon “Toshshahartransxizmat” AJning 1000 dan ortiq haydovchilari malakasi oshirildi.