O’zbekiston Respublikasi Prezidenti “Xalqaro shartnomalarga qo‘shilish to‘g‘risida”gi qarorni imzoladi.

Mazkur hujjat bilan O’zbekiston Xavfli yuklarni xalqaro yo‘llarda tashish to‘g‘risidagi Yevropa bitimiga (Jeneva, 30-sentyabr 1957-yil) hamda mazkur Bitimga o‘zgartirishlar kiritish haqidagi Protokolga (Jeneva, 28-oktyabr 1993-yil) qo‘shildi.

Xavfli yuklarni xalqaro yo‘llarda tashish to‘g‘risidagi Yevropa bitimi 1968-yilning 29-yanvaridan kuchga kirgan bo‘lib, 51 mamlakat jumladan Ozarbayjon, Belorussiya, Gruziya, Qozog‘iston, Rossiya, Tojikiston, Turkiya va Ukraina unga a’zodir.

Yevropa bitimining asosiy maqsadlari quyidagilardan iborat:

- odamlar, uskunalar va tuzilmalar hamda atrof-muhit xavfsizligini ta’minlash;

- xavfli yuklarni ortish, tashish va saqlash vaqtida xatarlarni maqbul darajagacha kamaytirish;

- xavfli yuklar tasnifiga kiruvchi tovarlar bilan savdo jarayonlarini tezlashtirish va tartibga solish.

O'zbekiston Respublikasi Transport Vazirligi axborot xizmati