Joriy yil 26 – 27 avgust kunlari O‘zbekiston Respublikasi Transport vaziri I. Maxkamov, O‘zbekiston Respublikasi Prezidentining Afg‘oniston bo‘yicha Maxsus vakili I. Irgashev boshchiligidagi delegatsiyaning Afg‘onistonga safari amalga oshirildi.

Safar davomida Afg‘oniston Transport va fuqaro aviatsiyasi vaziri vazifasini bajaruvchi Mullo Hamidullo Oxunzoda bilan “O‘zbekiston-Afg‘oniston-Pokiston” avtomobil yo‘nalishi bo‘ylab ekspeditsiya amalga oshirildi.

Ekspeditsiya jarayonida “O‘zbekiston – Afg‘oniston – Pokiston” avtomobil yo‘nalishidagi, Qobul shahrini Afg‘oniston shimoli (Mozori-Sharif) bilan bog‘lovchi “Salang” dovoni hamda Afg‘oniston va Pokiston chegarasidagi “Torxam” chegara o‘tkazish punktidagi vaziyat joyiga chiqqan holda o‘rganildi.

Ikki tomonlama muzokaralarda Afg‘oniston va Pokiston orqali Hind okeani portlariga chiqish uchun xalqaro transport koridorini shakllantirish, ikki davlat transport logistika korxonalari hamkorligini kuchaytirish, xalqaro avtomobil tashuvchilariga qulay shart-sharoitlar yaratish, shu jumladan Afg‘oniston hududi bo‘ylab tranzit o‘tishga hamda boshqa manzillarga yuk tashishga o‘rnatilgan cheklovni olib tashlash masalalari muhokama qilindi.

Uchrashuv yakunida tomonlar ikki mamlakat o‘rtasida va tranzit yuk tashuvlarini rivojlantirish uchun barcha imkoniyatlarni safarbar qilishga kelishib oldi.