Ўзбекистон Республикаси Президентининг топшириғига биноан хорижий мамлакатлардан фуқароларимизни Ватанга қайтариш бўйича амалий ишлар олиб борилмоқда.

Мазкур топшириқнинг ижросини таъминлаш мақсадида, Ўзбекистон Республикасининг хорижий давлатлардаги дипломатик ваколатхоналари, консуллик муассасалари ҳамда миллий авиакомпания вакиллари томонидан Ватанга қайтиш истагини билдирган фуқароларнинг рўйхатлари шакллантирилган.

Жорий йилнинг 11 майидан 24 майига қадар фуқароларни хориждан олиб келиш жадвали тайёрланган:

Амалга ошириладиган парвозларга дипломатик ваколатхоналар ҳамда консуллик муассасалари томонидан фуқаролар рўйхатга олинади ҳамда “Uzbekistan airways” авиакомпаниясига тақдим этилади ва фуқаролар ушбу рўйхат асосида ҳаво кемаси бортига киритилади.

Рўйхатга биринчи навбатда касал ёки бемор фуқаролар, ёш болали ва ҳомиладор аёллар ҳамда кекса ёшдаги фуқаролар, шунингдек бекор қилинган доимий авиақатновларга чипта ҳарид қилган фуқаролар қўйилади.

Хорижий мамлакатларнинг ички тартиб ва карантин қоидаларини бузмаслик, шунингдек фуқароларимизнинг хорижда бегона шахслар билан алоқага кирган ҳолда касалликни юқтириб олиш хавфининг олдини олиш мақсадида, дипломатик ваколатхоналар ҳамда консуллик муассасалари ходимлари фақат телефон орқали хабар беришларини кутишлари, чартер рейсига навбати келганлиги ҳақидаги хабарни олганларидан сўнггина аэропортга боришлари тавфсия этилади.

Чартер рейсларига сотувга қўйилган чипталар энг минимал тарифдан юқори бўлмаслиги белгиланган. Масалан, Москва ва Санкт-Петербург – Тошкент 147 АҚШ долл. , Деҳли-Тошкент 224 АҚШ долл. , Шаржа-Тошкент 221 АҚШ долл. , Истанбул-Тошкент 285 АҚШ долл.

Чипталарни фуқаролар парвоздан 4 соат олдин ҳорижий мамлакатларнинг халқаро аеропортларидаги “Uzbekistan airways” авиакомпаниясининг кассаларидан олишлари мумкин бўлади.

Ўзбекистон Республикасига қайтган барча фуқаролар ўрнатилган тартибда, санитария ва карантин қоидаларига қатъий амал қилган ҳолда 14 кундан кам бўлмаган муддатга карантин марказига жойлаштирилади.

Яна бир муҳим маълумот, Ўзбекистон Республикаси Президентининг топшириғига мувофиқ, бугунги кунда хорижий мамлакатлардан Ўзбекистон Республикасига қайтиш истагида бўлган барча Ўзбекистон фуқаролари босқичма- босқич равишда қайтарилади.

Шу ўринда бир нарсани алоҳида таъкидлаб ўтмоқчимиз, ҳозирги кунда коронавирус инфекцияси билан касалланган фуқароларнинг 43 фоизини Ўзбекистон Республикасига хориждан олиб келинган фуқаролар ташкил этади. Шу боис хорижда бўлиб турган фуқароларимиздан ўрнатилган карантин талабларига қатъий амал қилишни сўраб қоламиз.