Жорий йилнинг 3 октябрь куни Ашхободда Транскаспий транспорт кесишмаларини мувофиқлаштириш платформасини ишга туширишга бағишланган олий даражадаги учрашув бўлиб ўтди.

Тадбирда ЕИнинг халқаро ҳамкорлик бўйича комиссари Ютта Урпилайнен, Европа комиссиясининг халқаро ҳамкорлик бўйича бош директори маслаҳатчиси Хенрик ХоллоуЭй, шунингдек, Туркманистон, Қозоғистон, Қирғизистон, Тожикистон, Ўзбекистон, Озарбайжон, Туркия, Арманистон, Грузиянинг тегишли вазирликлари раҳбарлари, Осиё тараққиёт банки, Осиё инфратузилмавий инвестициялар банки, Европа тикланиш ва тараққиёт банки, Европа инвестиция банки, Ислом тараққиёт банки ва Жаҳон банки вакиллари иштирок этди.

Тадбирда транспорт инфратузилмасини кенгайтириш ва транспорт боғлиқлигини мустаҳкамлаш минтақа мамлакатларининг иқтисодий ўсишида ҳал қилувчи роль ўйнаши таъкидланди.

Янги мувофиқлаштириш платформаси Транскаспий транспорт йўлагининг барқарорлигини ошириш ва уни Европа ва Осиёни боғлайдиган мултимодал маршрутга айлантириш, шунингдек, темир йўл, автомобиль ва порт инфратузилмасига инвестицияларни рағбатлантириш, Европа ва Марказий Осиё ўртасидаги иқтисодий алоқаларни мустаҳкамлаш, транспорт йўлакларининг хавфсизлиги ва барқарорлигини оширишга ёрдам беради.

Платформа доирасида биргаликда ишлаш транспорт соҳасига технологик инновацияларни фаол жорий этишни назарда тутади.