Транспорт вазирлиги ҳузуридаги Автомобиль йўллари қўмитаси раиси Жамшид Турсунов Европа тикланиш ва тараққиёт банки (ЕТТБ) делегацияси вакиллари билан учрашди.

Ушрашувда ЕТТБ иштирокидаги “Д 213 “Урганч—Хонқа—Ҳазорасп—Амударё дарёси—А380” автомобиль йўлининг 0—84-км қисмини реконструкция қилиш” лойиҳаси бўйича музокаралар олиб борилди.

Лойиҳа Ўзбекистон Республикаси Президентининг 2024 йил 8 ноябрдаги ПҚ-390-сон қарорига мувофиқ амалга оширилмоқда. Лойиҳа доирасида ЕТТБ билан 2024 йил 2 майда 238 млн долларлик қарз битими имзоланган. Лойиҳанинг умумий қиймати 294,1 млн долларини ташкил қилади, шундан ЕТТБ қарз маблағлари–238 млн доллар, Ўзбекистон Республикасининг улуши – 56,1 млн доллар қилиб белгиланган.

Лойиҳа доирасида 84 км узунликда 4 тасмали (ҳозирда 2 тасмали) цемент-бетон қопламали автомобиль йўли қурилади, қиймати 15,8 млн долларлик 43 та кўприк (1000 пм), 27 млн долларлик 2 дона йўл ўтказгичлари (1000 пм), 1,7 млн долларлик 3 та ерусти пиёдалар ўтиш йўллари ҳамда 70 км пиёдалар ва велосипед йўлаклари барпо этилади.

Учрашувда шунингдек, “Тошкент-Самарқанд” пуллик автомобиль йўлини қуриш лойиҳасининг жорий ҳолати юзасидан ҳам музокаралар бўлиб ўтди. Учрашувда ҳар икки лойиҳани жадаллаштириш бўйича томонлар ўз таклифларини беришди.